Eusko Jaurlaritzako Osasuneko sailburu Alberto Martínezek ostegun honetan iragarri duenez, bere saila dagoeneko lanean ari da pazienteek eta herritarrek euskal osasun-sisteman benetan eta modu egituratuan parte hartzea bermatuko duen arau-garapenean.
Hala aurreratu du gaur eguerdian Madrilen egin den Nitid Health Foroan. Bertan, Carina Escobar Pazienteen Elkarteen Estatuko Plataformako (POP) presidentearekin batera, pazienteek osasun-sistemen eragile estrategiko gisa duten eginkizunari heldu dio.
Nabarmendu duenez, Euskadi "aitzindaria" da arlo horretan, Osasuneko Herritarren Partaidetzarako lehen Plan Zuzentzailea eginez. Plan horrek lehen partida bat du 2026ko aurrekontuetan, eta haren helburua da “juridikoki artikulatzea pazienteen elkarteen espezifikotasuna aitortzea, haien independentzia bermatzea eta haien eragiteko gaitasuna indartzea”.
Horren barruan sartzen dira, sailburuaren ustez, hainbat ekimen, hala nola pazienteen elkarteen euskal erregistro bat sortzea, horiek prestakuntza-laguntzen bidez bultzatzea , edo osasun-profesionalek beren pazienteei elkarteetatik bertatik agintzea.
Alberto Martínezen hitzetan, “pazienteak Euskadiko osasun-sisteman duen rolaren mugarri bat dago, Euskal Osasun Itunaren prozesuaren ondoren, maila guztietan parte hartzea aurreikusten baita: kontsultatik plangintzara, parte-hartze hori bultzatzen duen arau-garapenetik bera barne”. “Eta beti —gaineratu du— inor atzean ez uzteko konpromisotik abiatuta, eta arreta pazienteen esperientzian eta osasun-emaitzetan jarrita”.
Elkarteen zeregina, giltzarri
Hain zuzen ere, azpimarratu duenez, elkarteen zeregina funtsezkoa izan da Osasunaren Euskal Ituna lortzeko. Itun horren 24 ildo estrategikoetako batek “Deliberazioa eta erabaki partekatuak hartzea: herritarren parte-hartzea eta osasun-sistemaren gardentasuna bultzatzea” du helburu.
Ardatz estrategiko horretan, etorkizuneko arau-esparru hori hainbat ekintzarekin osatzea aurreikusten da, hala nola elkarte-sarea indartzea , informazio erabilgarria eskuratzeko aukera hobetzea, parte-hartzearen kultura bultzatzea , pazientearen esperientzia sistematikoki integratzea, parte-hartzean ekitatea sustatzea edo Pazienteen Arretarako Zerbitzuak (PEAZ) indartzea.
Kolektibo horietako ordezkariek, hala nola Pedro Carrascalek , Euskadiko Gaixoen Erakundeen Plataformako presidenteak (estatuko 47 federazio biltzen ditu); Karmele Garrok, Euskadiko Esklerosi Anizkoitzaren Fundaziokoak; eta Mari José Canok, FEDEAFESekoak (Gaixotasun Mentala duten Pertsonen eta Senideen Elkarteen Euskadiko Federazioa), duela gutxi nabarmendu dute lehen aldiz parte hartu ahal izan dutela paziente gisa horrelako prozesu batean, Euskal Osasun Itunari dagokionez, eta berretsi egin dute inplementazioan eta jarraipenean inplikatuta jarraitzeko konpromisoa.
