Jaiotzak %2,1 igo dira Euskadin bigarren hiruhilekoan

EAEn 3.286 haur jaio ziren 2025eko bigarren hiruhilekoan, 2024an baino 68 gehiago, eta aurreko urteko aldi beraren aldean %2,1 gehiago, Eustaten datuen arabera.

Lurraldeka, Bizkaian %6,2ko igoera izan da; Araban eta Gipuzkoan, berriz, jaiotza kopurua %1,5 eta %1,6 jaitsi da, hurrenez hurren. Zehazki, Bizkaian 1.637 haur jaio ziren, Gipuzkoan 1.136 eta Araban 513.

Hilabeteka, jaiotza kopuru handiena ekainean izan zen, 1.121 (%34,1), ondoren maiatzean, 1.102 (%33,5), eta azkenik apirilean, 1.063 haur jaio baitziren (%32,4).

Amaren adinaren arabera, 35-39 urteko amen taldea lehenengo postuan dago, jaiotzen %33,9rekin. Ondoren, 30-34 urteko taldea dago, %33,7rekin. Nabarmentzekoa da hiruhileko horretan 25 eta 29 urte bitarteko amen jaiotza kopurua %14,7koa izan zela, 40 urte edo gehiagoko amen kopurua %11,4koa baino handiagoa.

Ezkontzatik kanpo

Ezkontzatik kanpoko jaiotzak guztizkoaren %50 izan ziren, 2024ko aldi berean izandako %50,1arekiko jaitsiera txiki bat. Bizkaiak Euskadi osoak baino balio handiagoa izan zuen (%51,7); Arabak eta Gipuzkoak, berriz, ehuneko txikiagoak izan zituzten, %48,7 eta %48,1, hurrenez hurren.

Eustatek nabarmendu du ama ezkongabeen artean 25 urtetik beherako emakumeen proportzio handiagoa dagoela (%9,8) ama guztien aldean.

Jaiotza-hurrenkerari dagokionez, 2025eko bigarren hiruhilekoan jaiotako seme-alaben erdiak baino gehiago (1.667) lehenengo ondorengoak izan ziren, hau da, ehuneko 1,3 puntuko igoera aurreko urtearekin alderatuta.

Bestalde, 1.175 jaiotza (%35,8) bigarren seme-alabei dagozkie, eta hirugarren mailakoak edo ondorengoak 444 izan ziren, guztizkoaren %13,5.

2025eko udaberriko hilabeteetan Euskadin izandako jaiotzen %25,3an, amak atzerriko nazionalitatea zuen, 2024ko bigarren hiruhilekoko ehuneko berean. Lurralde historikoka, ehuneko hori %32,5ekoa izan zen Araban, %24,4koa Bizkaian eta % 23,2koa Gipuzkoan.