Itsasoa berrikuntza eta enplegu motor bihurtzeko ekimena bultzatuko du Gipuzkoak

Gipuzkoako Foru Aldundiak GK Kantauri Itsasoa ekimena aurkeztu du asteazken honetan. 40 eragile sozial, enpresarial, zientifiko eta instituzional baino gehiago inplikatzen ditu "Kantauri itsasoa berrikuntzaren, enpleguaren eta etorkizunaren motor bihurtzeko" helburuan.

Iraunkortasunerako Foru Departamentuak ohar batean jakinarazi duenez, "aliantza urdin handi" hori, Jose Ignacio Asensio diputatuak Donostian egindako jardunaldi instituzional batean ezagutarazia, "Gipuzkoatik Arku Atlantikoaren trantsizio ekologikoaren buru izateko jaio da".

Kontua da "itsasoa transformazio-motor bihurtzea. Ekintza-komunitate irekia, erabilgarria eta partekatua, itsas plastikoa baliabide, berrikuntza estrategia eta enplegu urdina errealitate bihurtzeko".

Ekosistema urdina

"Ez dugu ideiarik aurkeztu. Elkarlanerako tresna bat aktibatzen dugu. Ikuspegiarekin, metodoarekin eta etorkizunerako bokazioarekin ", azaldu du Asensiok agerraldian, eta GK Kantauri Itsasoa "zientzia, enpresa, hirugarren sektorea eta erakundeak batzen dituen gobernantza partekatuko egitura" dela argitu du, "kostaldearen eta itsasoaren erronkei modu kolektiboan erantzuteko".

Aliantza hau Gipuzkoako ekosistema urdineko 40 eragile baino gehiagoren inplikazio aktiboarekin hasten da, enpresa industrialak, kooperatibak, zentro teknologikoak, unibertsitateak, ingurumeneko GKEak eta ordezkari instituzionalak barne.

Ekimen aitzindari honen ibilbide orria hiru ardatz nagusiren inguruan egituratuko da: "berrikuntza eta eraldaketa produktiboa"; "ekintzailetza, inbertsioa eta enplegu urdina"; eta "gobernantza, lurraldea eta parte-hartzea".