Estatuko Aldizkari Ofizialak (BOE) ostegun honetan argitaratu du Espainiako Gobernuaren instrukzio berria, eta ,horren arabera, ezin izango da zuzenean inskribatu Erregistro Zibilean atzerrian haurdunaldi subrogatu bidez jaiotako haurtxorik. Segurtasun Juridiko eta Fede Publikoko Zuzendaritza Nagusiaren instrukzio horrekin, haurdunaldi subrogatu bidezko jaiotzen filiazioaren erregistro-araubidea eguneratzen da, eta, beraz, hemendik aurrera, Espainiako ordenamenduan erregistro-inskripzioa formalizatzeko aurreikusitako bide arruntak eskatuko dira.
Eskubideak urratzea
Horrela, Espainiako Gobernuak Auzitegi Gorenaren epaira egokitu du Espainiako erregulazioa. Epai horren arabera, alokairu-sabelak merkantilizazioa dira eta duintasuna kentzen diete emakumeei eta adingabeei, eta atzerriko ebazpen judizial batek ere ez du aukerarik ematen kontratu horiek Espainiako Estatuan baliozkotzeko.
Atzerrian haurdunaldi subrogatuaren bidez jaiotako adingabe baten seme-alabatasuna eskatzeko, eskatzaileek Espainiako Estatura bidaiatu beharko dute adingabearekin eta pasaportearekin, bai eta jaio den herrialdeko agintarien kasuan kasuko baimenekin ere. Behin Estatuan, Espainiako ordenamenduan aurreikusitako bitartekoen bidez zehaztuko da seme-alabatasuna, hau da, "asmoko gurasoetako" baten filiazio biologikoaren bidez, eta "geroko adopzioko filiazioaren bidez, behar besteko bermea duen familia-nukleoa dagoela frogatzen denean".
Lege-zirrikituetarako amaiera
Instrukzio berriak indarrik gabe uzten ditu 2010eko eta 2019ko jarraibideak, zeinak ezartzen baitzituzten kontsulatuen erregistroetan adingabeak zuzenean inskribatzeko baldintzak. Erregistro zibiletako arduradunek ez dute "inola ere" onartuko, haurdunaldi subrogatu bidez jaiotakoen jaiotza eta filiazioa inskribatzeko titulu gisa, atzerriko erregistro-ziurtagiririk, adierazpen hutsarekin batera adingabearen jaiotzari buruzko mediku-ziurtagiririk, ez eta dagokion herrialdeko agintari judizialen epai irmorik ere. Haurdunaldi subrogatu bidez jaiotako adingabeak inskribatzeko eskabideak ez dira egingo instrukzioa BOEn argitaratu ondoren.
