Agifesek agorafobia jorratuko du Donostiako zineforum saio batean

Agifes Gipuzkoako osasun mentaleko arazoak dituzten pertsonen eta haien senideen elkarteak datorren asteartean, martxoak 25, Donostian antolatu duen zineforum-saioan agorafobia izango da gai nagusia.

Ekitaldian, ' Barruko dardara ' laburmetraiari buruzko proiekzio eta solasaldia izango da. Maider Arruti ikus-entzunezko errealizazioko ikasleak zuzendu du eta Agifesen osasun mentaleko arazoak dituzten gazteentzako Zeuk Aukeratu programan parte hartu du.

Film laburraren proiekzioaren ondoren, Arrutik hausnarketa bat egingo du, agorafobiarekin, antsietatearekin eta anorexiarekin lotutako osasun mentaleko hainbat arazo gainditu baititu.

Lan honen egilearen esanetan, "agorafobiak dakarren sufrimenduaren ikuspegi errealistagoa erakutsi beharra sentitzen nuen – leku irekietan edo laguntzarik ez dagoen egoeretan egoteko beldur bizia bezala agertzen da –, baita errekuperazio prozesuaren ikuspegia ere, sare sozialetan kontatzen dena baino zailagoa izan baitaiteke".

Gaztea Agifesen 'Zeuk Aukeratu' programaren barruan dago, eta nerabe eta gazteen osasun mentala zaintzeko prebentzioa eta esku-hartzea bultzatzen ditu.

Programak bi lan ildo ditu: batetik, prebentzioa eta sentsibilizazioa ikastetxeetan, eta, bestetik, osasun mentaleko arazoak dituzten gazteei laguntzea "bizitza proiektu propio eta itxaropentsu bat" diseinatzen.

Agifesetik zehaztu dutenez , Maider Arruti astero Agifesen psikologo baten gidaritzapean "elkarri laguntzeko" biltzen den gazte taldera joaten da, eta banakako laguntza ere jasotzen du.