Azpeitiko ikastolak antolatuko du 2024ko Kilometroak

Errenteria –Azpeitiko Ikasberri ikastolak izango du datorren urteko Kilometroak antolatzeko ardura, atzo Errenteriako Orereta ikastolako arduradunek lekukoa eskualdatu zutenean agerian geratu zenez.

Astelehen honetatik bertatik hasita, Azpeitiko Ikasberri ikastolako arduradunek “lanez jositako urtea” izango dute aurrean, atzoko ekitaldian Mattin Garmendiak, Laiene Ezamak eta Amane Urbietak azaldu zutenez. Inolaz ere, erronka handi hori ilusioz eta pozez gainezka hartu dutela azpimarratu zuten.

Laugarren Kilometroak

Ikasberrik laugarrenez antolatuko ditu kilometroak, aurreko edizioak 1979an, 2000n eta 2011n egin ondoren. Oraingo honetan, ikastolen eredutik bertatik zein egungo gizartetik abiatuta, euskara, kulturartekotasuna eta herrigintza izango omen dituzte helburu.