Osasun Ministerioak abenduaren 15etik aurrera debekatu egin du Espainian hiru sendagai -Isohes, Volulyte eta Voluven- merkaturatzea. Sendagai horiek ere ezingo dira gehiago erabili, Europako osasun-agintariek uste baitute haien administrazioarekin lotutako arriskuak onurak baino handiagoak direla.
Sendagaiek hidroxietil-almidoia (HEA) dute, plasmako espansore koloidala. Orain arte, odoljario akutuak eragindako hipobolemia tratatzeko baimenduta zegoen, kristaloideekin bakarrik egindako tratamendua nahikoa ez zenean.
Sendagaien eta Osasun Produktuen Espainiako Agentziak (Aemet) merkaturatzearen amaiera-data jakinarazi du, aurtengo ekainean jakinarazi ondoren sendagai horien erabilera eten egingo dela.
Osasun zentroetan Isohes, Volulyte eta Voluvenen izakinak ohiko kanalen bidez itzultzen ahalko dira laborategi titularretara.
2013. urtean, dagoeneko, murrizketak sartu ziren baimendutako erabilera-baldintzetan, giltzurruneko gutxiegitasunaren arriskua eta zenbait pazienteren heriotza-arriskua handitu egin baitziren. Gero, 2018an, sarrera kontrolatuko programa baten arabera baliozkotutako ospitale eta osasun-zentroetara mugatu zen.
Hala ere, batzordeak ondorioztatu du 2018an sartutako murrizketek ez zutela behar bezala bermatu sendagai horiek modu seguruan erabiltzea, "oraindik ere kalte larria egin dutela frogatu den gaixo talde batzuetan erabiltzen baitira".
Hori dela eta, Europar Batasuneko herrialde guztietan erabilera etetea erabaki da. Europako Batzordeak erabaki hori onartu du, eta Espainian hurrengo astean gauzatuko da.
