Síguenos en redes sociales:

Urumean hildako ertzainaren aurkako mezuengatik hiru gaztek deklaratu dute

Hildako agentearen aurkako mezuak ugari zirela ikusita hasi zen prozedura judiziala, Ernek salaketa jarri ostean

- N.G.

02·03·21 | 00:12 | Actualizado a las 23:37

- Abenduaren 30ean Urumea ibaira erorita hildako ertzainaren aurkako mezuak sare sozialetan argitaratzeagatik atzo deklaratu zuten hiru gaztek Donostiako Instrukzioko 5. Epaitegian gorroto-delitu baten ustezko egile gisa.

Prozedura judiziala Ertzaintzako Erne sindikatuak salaketa jarri ostean abiarazi zen, hildako agentearen eta istripuan bizia salbatu zuen beste ertzainaren aurkako mezuak ugaritu zirela egiaztatu ostean.

Dena den, 47 urteko agentearen heriotza ekarri zuen istripua gertatu eta ordu gutxira iragarri zuen Segurtasun Sailak, ikerketa hasi zuela mezu "lausengatzaileengatik", eta ekintza legalak sustatuko zituela auzitegietan.

Ikertutako hiru gazteek atzo epailearen aurrean esan zutenez, euren mezuen edukiaz damututa omen daude, eta ez omen zuten uste minik eragin zezaketenik. Kasuaren inguruko iturriek jakitera eman dutenez, barkamena ere eskatu zuten.

Sare sozialetan euren izen-abizenekin identifikatutako hiru gazte direnez, erraz lekutu eta epaitegira deitu ahal izan dituzte; inolaz ere, kontu anonimoetatik antzeko mezuak igorri zituzten beste erabiltzaile batzuen nortasuna ikertzen jarraitzen du Ertzaintzak.

Aipatu, laugarren pertsona bat ere bazegoela atzorako deituta, baina ez zela bertaratu Castellon bizi delako; datozen egunetan deklaratuko omen du bideokonferentziaz.