Azaroaren 24tik 28ra Imanol Lizardi Bertso Astearen bigarren edizioa ospatuko da Lasarte-Orian. Bost egunetan jarduera, ikuskizun eta bertso saioak egingo dira, kalean euskaraz gozatzeko eta gazteen eta familien artean sormena sustatzeko.
Bertsolaritzari eskainitako urteroko espazioa sendotzea bilatzen du ekimenak, euskal kulturan hain errotuta dagoen adierazpen artistiko horrekiko herritarren lotura indartuz. Bertso Astea Lasarte-Oriako Udalak antolatu du, Ttakun Kultur Elkartearekin eta Earra! Bertso-Eskolarekin elkarlanean.
Aurtengo egitarauak publiko ezberdinei zuzendutako jarduera eskaintza zabala biltzen du. Azaroaren 24an, astelehenean, Bertso Garbitzailea ikuskizunarekin irekiko da astea, Lehen Hezkuntzako 5. mailako ikasleentzat. Saio didaktiko eta interaktiboa da, bi bertsolari eta aktore bat ditu protagonista, eta umorea eta parte-hartzea uztartzen ditu, ikasleak euskarazko inprobisazioaren mundura hurbiltzeko. Hitzordua 15.15ean izango da Manuel Lekuona kultur etxeko auditorioan.
Bertso Poteoa eta Sariketa
Ostegunean, hilaren 27an, 18.30etik aurrera, herriko kaleak giroz beteko dira Bertso Poteoarekin, Earra! Bertso Eskolako gazteek eta herriko bertsolari ezberdinak parte hartuko dutelarik. Bertsoa kalera atera nahi duen jai ibiltaria izango da, taberna, plaza eta erdiguneko txokoen arteko elkarbizitza eta euskaraz gozatzea bultzatuz.
Ostiralean, hilaren 28an, asteko ekitaldi nagusia izango da: Imanol Lizardi II. Bertsolari Gazteen Sariketa. Euskal Herriko lurralde ezberdinetatik etorritako sei gazte promesek hartuko dute parte: Urko Arakistain (Gipuzkoa), Kattalin Arabaolaza (Gipuzkoa), Enara Gallastegi (Bizkaia), Jokin Onaindia (Araba), Ekhi Zuloaga (Bizkaia) eta Maddi Lasa (Lasarte-Oria – Earra! Bertso Eskola). Olatz Zuazubiskar izango da gai jartzailea eta Unai Muniain eta Amaia Otxotorenak osatuko dute epaimahaia. Finala 18.00etan izango da, Mirentxueneako beheko solairuan, eta sarrera doan izango da.
Lehiaketak fase orokor bat izango du, eta bi onenen arteko finala. Probek tradiziozko modalitateak uztartuko dituzte, hala nola 8ko handian eta 8ko txikian ofizioa, puntuazio eta bertsogintza libreko erronka sortzaileekin.
Lehenengo sailkatuak 400 euro, zapia eta garaikurra jasoko ditu, eta bigarren sariaren irabazlearentzat 200 euro eta oroigarria izango dira. Gainerako parte-hartzaileek, epaimahaiak eta aurkezleak ere saria jasoko dute.
Imanol Lizardiri buruzko erakusketa
Ekitaldi nagusiez gain, aste osoan zehar argazki erakusketa ikusteko aukera izango da Jalgi tabernan, Imanol Lizardiren figura eta bertsolaritzak Lasarte-Orian utzitako arrastoa ardatz hartuta. Jarduera guztiak herritarrei irekiak eta doakoak dira.
Aurkezpenean, Estitxu Alkorta zinegotziak azpimarratu zuenez, bigarren edizio hau “aurrerapauso bat da Udalak bertsolaritza herritar guztiengana hurbiltzeko egin duen apustuan, bereziki gazteei eta familiei”.
Bestalde, Earra! bertso eskolako ordezkariak, Joxe Krutz Labakak, bertsolaritza “balio handiko tresna hezitzaile eta kulturala” dela nabarmendu zuen. “Gazteen artean adierazpena, entzumena eta sormena sustatzen ditu”, gaineratu zuen.
