'Bio eta Zabor' erakusketa zabaldu da Hondarribian itsas hondakinen arazoari buruz gogoeta sustatzeko

Zero Zabor Uretan egitasmoaren barruan, Mater Ontzi Museo Ekoaktiboak 'Bio eta Zabor' izeneko erakusketa ibiltaria zabaldu du HondarribikoArma Plaza erakusketa aretoan. Ekimenaren helburua garbia da: itsas hondakinen arazoari buruzko gogoeta sustatzea eta irtenbide partekatuen bila abiatzea. Haurrek, komunitateek, erakundeek eta erakunde publikoek bat egiten dute, kontsumo arduratsuago baterako mezua lau haizeetara zabaltzeko.

Erakusketa hau Materen Zero Zabor Uretan kanpainaren zazpigarren edizioaren baitan kokatzen da, Eusko Jaurlaritzaren, Bizkaiko eta Gipuzkoako Foru Aldundien eta Libera proiektuaren babesari esker. Aurten Bilbo, Portugalete, Bermeo, Ondarroa, Mutriku, Getaria, Pasaia eta Hondarribiko neska-mutilen mezuak jaso dira, itsaso garbiago baten aldeko aldarrikapen indartsu gisa.

Zabor eta Bio izeneko bi erraldoi artistikok erakusketari ikusgarritasuna eta indar sinbolikoa ematen diote. Lehenak, Zabor izenekoak, kontsumo neurrigabearen ondorioz sortzen den kutsadura isilaren aurpegia erakusten du; bigarrenak, Bio-k, izaki bizidunek osatzen duten sare ahulean oinarritutako bizitza orekatua aldarrikatzen du. Bi irudi hauek komunitatean barrena ibili dira, eta gaurtik aurrera Arma Plazan izango dira ikusgai, ekainaren 22ra arte.

Gaurko inaugurazioan, Izaskun Suberbiola Mater-en zuzendaria eta egitasmoaren arduradunak argi mintzatu da haurrek egiten duten ekarpenaren garrantziaz: “Ekintza bakoitzak balio du. Ohitura aldaketak behar ditugu, eta haurrak oraindik ez daude errotuta gure erosotasun-eremuan. Horregatik, horiekin ari gara lanean: beraiek dira aldaketarako benetako katalizatzaileak.”