Donostiako Piratek 2025eko Aste Nagusirako egitaraua aurkeztu dute Donostiako kaian eskainitako agerraldian. Datorren abuztuaren 9tik 17ra bitartean ospatuko dira aurtengo jaiak, eta ohiko guneetan —Flamenkan, Trinitate plazan eta Alde Zaharreko hainbat txokotan— ospakizun, kontzertu, kale ekitaldi eta jarduera “parte-hartzaileak” prestatu dituzte.
Aurten, jaietako hasiera iragartzen duen txupina botatzeko ardura Pentsionisten Mugimenduak izango du. Piraten ordezkari Inge Ugarte eta Aitor Egañak adierazi dutenez, erabaki horrekin mugimendu sozial historiko baten borroka eta ekarpena aitortu nahi izan dute. Antolatzaileen esanetan, mugimendu hori "erreferente" bihurtu da pentsio duinen aldeko borrokan, belaunaldien arteko elkartasunean, baita sare sozial publikoan oinarritutako bizimodu duinaren aldeko ekarpenean ere.
Egitarau zabala aurkeztu dute eta adin guztietarako pentsatua. Ohiko abordaia, abuztuaren 11n egingo da arratsaldeko 17.30etan. Abordatze txikia, aldiz, abuztuaren 14an 16.00etan burutuko da kaian. Abuztuaren 15ean, bestetik, Piraten Eguna ospatuko da, egun osoko egitarau berezi eta bateratuarekin: kuadrillen arteko jolasak, herri bazkaria eta kontzertuak barne. Piraten programak txikientzako hainbat ekintza ere hartuko ditu bere gain, hala nola, tailerrak, ipuin kontakizunak eta joko kooperatiboak.
Musika
Musika eskaintza ere azpimarragarria izango da, eta bi gune nagusitan banatuko da berriro ere: Flamenkan eta Trinitate plazan. Flamenkako oholtzatik pasako dira, besteak beste, Izaki Gardenak, Olatz Salvador, Orekka erromeria, Merina Gris, La Txama eta Lukiek. Trinitate plazan berriz, formatu txikiagoko kontzertuak eskainiko dira, hala nola Revolutionary Brothers, Andoni Ollokiegi, Larre, Peppermint Sextet, eta La Jodedera.
Aurten ere, jai herrikoi, “parte-hartzaile eta transfeministak” izango dira Piraten Aste Nagusiko ardatz nagusiak eta ekintza aldarrikatzaileak ere ez dira faltako jai egitarauan. Abuztuaren 12an, Sardinaren Kofradiarekin elkarlanean, kalejira transfeminista eta Maruxa taldearen kontzertua; eta abuztuaren 16an, agerraldi feminista egingo dute Trinitate plazan 19.30etan.
Emakumeak
Piraten lan talde feministak adierazi duenez, aurten ere puntu morea egongo da jai gunean, eta Bulebarrean Emaginek kudeatuko dute artatze gunea, behar duen orori laguntza emateko. Hala ere, Piratek argi utzi nahi izan dute “ez dela nahikoa puntu bakarra hirian”, eta puntu gehiago jartzeko eskaria egin dute beste behin.
Jai hauek “herrikoiak, irekiak eta parte-hartzaileak” izatea dutela helburu aldarrikatu nahi izan dute Donostiako Piratek. Ildo horri jarraituz, antolakuntzako kideek dei egin diete herritarrei festak modu arduratsuan eta errespetuz bizitzeko, elkar zaintzaren eta auzolanaren baloreekin bat eginez. Jai egitarau osoa kontsultatzeko, www.donostipiratak.eus webgunera jo daiteke.
