Iparraldeko haurrak ikastetxeetara itzuliko dira gaur

Hamaika urte baino gehiagoko ikasleek maskarak jantziko dituzte derrigor

01.09.2020 | 00:22
Irakasleek bezala gaurtik Iparraldeko ikasleek ere musukoa jantzi beharko dute egun osoan.

Baiona – Frantziako Estatuko hamabi milioi gaztetxo pasa ikastegietara itzuliko dira gaurtik, hauen artean, Ipar Euskal Herriko ehunka haur. Covid-19 izurriteak itzulera osoki baldintzatzen du eta irakasle eta familien artean kezka sortzen segitzen du. Miarritzeko herriko etxeak proposaturik bertako irakasle, laguntzaile eta udal langileek PCR probak egin ditzakete lanera lasaiago itzuli ahal izateko. Hezkuntza arloko profesional eta sindikatuek deitoratzen dute herri gehienetan ez dagoela horrelako eskaintzarik eta irakasle lanpostuak falta direla egoera berriari aurre egin ahal izateko. Jean Michel Blanquer Frantziako hezkuntza ministroak adierazi du "itzulera ahal bezain normala egingo dela martxoan baino kutsatze askoz gutxiago dagoelako". Bere ustez, ohi baino gaixotasun gutxiago izango da aurten eskoletan eskuak maiz garbituko dituzte eta. Ikastegietan dabiltzan heldu guztiek eta hamaika urte baino gehiagoko ikasleek musukoak jantzi beharko dituzte derrigor, txikiagoek ez. Zenbait taldek begi txarrez ikusten dute langileek eta familiek maskarak erosi behar izatea. Pirinio Atlantikoetako departamenduko kontseiluak hamar maskara eskaintzea erabaki du institutuetan ikasten duten lurraldeko 31.500 gazteei. Bestalde, metatzerik izan ez dadin bazkaltzeko denboraldia luzatuko dute zenbait ikastegitan.

Izurritearen eraginak mugatua izaten segitzen duen arren Ipar Euskal Herrian, Hervé Jonathan Frantziako gobernuak Baionan duen ordezkariak ohartarazi du egoera okertzen ari dela. "Egunero bi positibo baizik ez genituen ekainean baina orain zenbait aldiz hogeita hamar bat kasu agertzen zaizkigu eta gaixo batzuk erietxeetan artatu behar ditugu. Halere, oraingoz ez dago inor suspertze zerbitzuetan". Ordezkariaren hi-tzetan ezinbestekoa da derrigorrezkoa ez den maskara ahal bezainbat janztea eta probak maiz egitea, oporretatik itzultzean bereziki.

Gorakada Lapurdiko kostaldeko gune jendetsuenetan musukoa eramatea derrigortzen duen dekretua iraila bukaera arte indarrean dagoela zehaztu du Hervé Jonathanek. Azken egunetan, hainbat kasu agertu dira, besteak beste, Baigorri eta Donibane Lohizuneko bi enpresa eta opor gune batean. Joan den udaberrian hamahiru lagun hil ziren Baionako ospitalean eta gutxienez bi zuberotar Pauekoan. Olivier Véran Frantziako osasun ministroak baztertu du martxoan bezalako itxialdi osoa berriz agintzea. Véranek dio gaur egun 29.000 paziente artatzen ahal dituztela susper-tze zerbitzuetan.

Udaberriko egun zailenetan, 7.000 lagun zeuden sail horretan. Bestalde, izurriteak krisi ekonomiko larria eragin du Bidasoa iparraldean ere, larriena Bigarren Mundu Gerra bukatu zenetik. Hazparne aldeko Lauak enpresa aeronautikoak, adibidez, lau langiletik bat kanporatuko du udazkenean negozio zifra %40 apaldu zaiolako. Sail berean ari den Angeluko enpresa batek 60 langile kanpo emanen ditu ere. Egoerari aurre egiteko, Frantziako gobernuak 100 mila milioi euroren plana aurkeztuko du datorren ostegunean, 2008ko krisian mahai gainean eman zuen halako lau hain zuzen.

Bertan behera gelditzen ari diren ekitaldien zerrenda gero eta luzeagoa da: Herri Urrats, Ezpeletako piper azoka, herrietako hainbat lasterkaldi. Igandean, halere, pazko astelehenez ospatu ohi den Sarako idazleen biltzarra egingo dute Larrun mendi magalean dagoen Lapurdiko herri horretan.

"Ekainean egunero bi positibo genituen; orain hogeita hamar bat kasu agertzen zaizkigu"

Hervé Jonathan

Gobernu ordezkaria