Eskubaloia Kopa antolatzen dabiltzan erakundeen ordezkariak ilusioz gainezka Tati Garmendia, Iñaki Gabarain, Marta Pastor eta Fernando Diez Mintegi astelehen honetan, Donostiako udaletxean. “Oso pozik gaude 2.500 pertsona baino gehiago etorriko direlako”, adierazi du Tati Garmendia Bera Bera Eskubaloiko arduraduna.
Erronka gainditu
Eskubaloiko Erreginaren Kopako azken fasea maiatzaren 10 ostiraletik, igandea 12ra bitartean jokatuko da Donostian, eta duela bi urte bertaratu zirenen errekorra gainditzea espero da, 3.089 jarraitzailek ikusi baitzuten azken fasea Gipuzkoako hiriburuan.
Donostiako Udaletxean aurkeztu zuten Kopa Illunben jokatuko aurten ere, 2022an bezalaxe, eta “eskubaloitik harago” joango den ekitaldia izango da, antolatzaileek aurreratu zutenez. Bertan izan ziren, Fernando Diez Mintegi Bera Berako presidentea, Tati Garmendi klubeko Eskubaloi ataleko arduraduna, Iñaki Gabarain Donostiako Kirol zinegotzia eta Marta Pastor Gipuzkoako Foru Aldundiko Kirol zuzendaria.
Kopako txapelketako final-laurdenak ostiralean jokatuko dira, lehen partida goizaldean hasita: Granollers-Elda Prestigio, 13:00etan hasita; beste hiru partidak arratsaldean jokatuko dituzte. Porriño-Aula Valladolid, 16:00etan, (lehia honen irabazleak aurrekoaren irabazlearen aurka jokatuko du finalerdietan); Elx-Malaga, 18:15etik aurrera; eta jardunaldia amaitzeko, 20:30etik aurrera, Super Amara Bera Bera anfitrioiak ekingo dio txapelketari Atletico Guardes talde galiziarraren aurka. Azken bi partida horietako irabazleek elkarren aurka neurtuko dituzte indarrak bigarren finalerdian.
Finala
Larunbatean bertan jokatuko dira finalerdiak, biak arratsaldean (16.30ean eta 19.45ean); titulua erabakiko duen final handia berriz, igandean 13:30etatik aurrera. Partida horiek guztiak Illunbeko pabiloian izango dira, eta Koparen ekimen eder horri bigarren azpiegitura bat ere gehituko zaio, sailkatutako klub guztien kadete mailako taldeek Minikopa jokatuko baitute ondoko José Antonio Gasca kiroldegian.
Ilusioa Iaz Malagan irabazitako tituluari eusten saiatuko den Bera Bera eskubaloiko arduradun Tati Garmendia pozik agertu zen, abonu asko saltzen ari omen direlako eta eskubaloiari Gipuzkoako lurralde osoan emango zaion bultzadagatik.
“Ilusioz gainezka gaude ekitaldiak dakarren garapenarekin; dagoeneko 2.500 pertsona baino gehiago etorriko direla bermatuta daukagu, eta 2022ko ikusleen bertaratze errekorra gaindituko dugulakoan gaude, orduan, finalean, 3.089 pertsona etorri baitziren”. Bide batez, eskerrak eman zizkien Donostiako Udalari eta Gipuzkoako Foru Aldundiari, “ekitaldiaren antolaketan eskainitako laguntzagatik”.
"2022ko ikusleen bertaratze errekorra gaindituko dugulakoan gaude, orduan, finalean, 3.089 pertsona etorri baitziren”
Iñaki Gabarain Udaleko ordezkariak eta Foru Aldundiko Marta Pastorrek beste berritasun batzuk ere eman zituzten ezagutzera.
Gabarainek azaldu zuenez, “Super Amara Bera Bera taldeko jokalariekin egindako promozio-iragarki baten bitartez, donostiarrak kirol-ekitaldi horretara etortzera animatzen ari gara”.
Sarbideak
Zinegotziak baieztatu zuenez, 2022an ez bezala eta Illunberako sarbidea erraztu asmoz, “instalazioaren lurpeko aparkalekua zabalik egongo da, eta, horrela, Kopako partidetara joaten diren pertsonek doako 400 aparkaleku inguru izango dituzte, kanpoko aparkalekuaz gain; izan ere, fan-zone-a asfaltatu gabeko gunean kokatu baita, joan-etorriak erraztu eta aparkaleku-plazak ez murriztearren”. Argi esan zuen, gainera, Anoeta inguruko obrek ez diotela eragozpenik eragingo Illunbeko igoerari.
Bestalde, Pastorrek gogora ekarri zuen “gaurtik aurrera egunean eguneko sarrerak eros daitezkeela. Abonuen salmenta oso ondo doa, giro bikaina espero dugu, eta jendeak eskubaloi onenarekin gozatzea”.
Gainera, zortzi taldeen jarraitzaileentzat zaleen gune bat egongo dela baieztatu zuten, baita Kopak iraungo duen jardunaldietan hainbat musika-kontzertu egingo direla ere”.
