Antiguako EAJ, Santa Agedari kantuan

04.02.2021 | 18:39

Urteroko legez, baina beste era batera. Antiguako EAJko hainbat karguk Santa Agedako koplak abestu dituzte ostegun honetan, egun seinalatuaren bezperan, baina bakoitza bere kabuz egin izan behar du.

Koronabirusak ezarritako baldintzak kontuan hartuta, ezinezkoa da kalerik kale ibiltzea aurten, eta alderdi jeltzaleak bideoa grabatu du gaur egungo egoerara egokitutako hurrengo koplekin:

Esperantzari begira dago
bi mila hogeitabata
zeinen gustora jasoko ditun
gure algara ta kanta

Eskeak beti emana dakar
hargatik gatoz kantari
neguak paso eman diezaion
udaberri berriari

Bihotzak bero zabalduz eman
dana eskutik eskura
ta urteekin berreskuratu
umeak duten freskura

Freskura horrek emango dio
gizarteari airea
zuek zerate gure arnasa
ta gure adibidea.

Bideoan, besteak beste, Legebiltzarreko presidentea, Bakartxo Tejeria; Donostiako alkatea, Eneko Goia; Nekane Arzallus, Juanra Viles, Mariaje Idoeta udal zinegotziak; Maria Eugenia Arrizabalaga Batzar Nagusietako EAJren bozeramalea; Joseba Agirretxea diputatua eta abestia ixten, GBBko presidentea eta Legebiltzarrean bozeramale jeltzale den Joseba Egibar.