Gipuzkoako Foru Aldundiak joan den larunbatean Oñatin izandako bortizkeria matxista kasua "indar guztiz salatu eta arbuiatu" du astelehen honetan argitara eman duen erakunde adierazpenaren bitartez. Aldi berean, "elkartasun osoa eta babesa eskaini dizkio" biolentzia pairatu duen emakumeari eta haren gertuko lagun eta senitartekoei.
Emakumeen kontrako indarkeriaren aurrean erantzun publikoa emateko Gipuzkoako protokolo Instituzionalari jarraituz, Foru Aldundiak Oñatiko Udalak aho batez adostu duen adierazpenarekin bat egin du. Gizon eta emakumeen berdintasun eza dago halako erasoen oinarri-oinarrian, "emakumeak kontrolpean izan nahi dituzten jarrera eta ideia matxistak".
Aldundiak adierazpenean "gizon eta emakumeen berdintasunaren aldarrian" jartzen du azpimarra; pertsonen duintasuna, askatasuna eta integritate fisikoa "eskubide urraezinak dira", eta eskubide horien aurka egiten duten jarrerak erabat gaitzesgarriak, bidegabeak eta onartezinak dira, ez dute lekurik gure gizartean.
Egungo pandemia egoeran, foru erakundeak herritarrei "dei egin die bortizkeria matxistaren aurkako jarrera eta konpromisoari eusteko", inoiz baino gehiago erne jarraitzeko, biolentzia jasaten ari diren emakumeek erakundeon eta komunitate osoaren babesa jaso dezaten. Erakunde eta herritar oro gertu gaude edozein unetan haiek laguntzeko.
