COVID-19aren pandemiaren bigarren olatu honek behartuta, "erantzukizuna" erakutsiz, eta Korrika "kalea eta jendetza" denaren jakitun, 22. edizioa 2022ra atzeratuko da.
Hala iragarri zuten atzo AEK-ko arduradunek Donostian egindako prentsaurrekoan, eta orain 15 egun hartutako erabakia "oso gogorra" izan dela onartu zuten.
"Maialenek Gasteizko Amabirjina Zuriaren plazako balkoian emandako hitzaldi hartatik, Korrikaren 22. edizioa prestatzen ari ginen. Joan den martxoaz geroztik hainbat aukera aztertu ditugu, baina une honetan egoera larria da. Korrikak jendearen beharra du, kalea behar du eta une honetan ez dugu aurreikusten hori posible izango denik ", esan zuten.
Badakite atzerapena "kolpe handia" dela, ez bakarrik "Korrika beharrezkoa delako", baita AEKrentzat diru iturri garrantzitsua ere badelako. Inolaz ere, euskaltegien saretik Ez-Korrikarik edo antzekorik antolatu nahi ez zutenez, "2022an Korrika berriz ere kalean izango den" itxaropenarekin agertu ziren.
2021ean lasterketa herrikoia nolabait ordezkatu eta euskaltegientzako finantziazio-iturri izan daitekeen jardueraren bat antolatuko ote duten galdetuta, zorrotz mintzatu ziren: "Birpentsatu behar dugun zerbait da. Tarteko zerbait antolatuko ote dugun aztertu behar dugu, baina argi daukagu zerbait izatekotan, Korrika ez den beste zerbait izango dela".
1980ko lehenengo edizioak Oñati eta Bilbo elkartu zituen, eta orduan, lasterketako bederatzi egunetan zehar, lekukoak gordetzen zuen mezua galdu ere egin zen. Hainbat eta hainbat izan dira lasterketa herrikoi hau inguratu duten istorioak, eta, halere, oztopo guztiak gainditzen jakin du, harik eta pandemia honek, 22 edizio geroago, ilusio guztiak hankaz gora jarri dituen arte.
Ez da, ordea, behin betiko agur bat, laster arte baizik; AEK-k lanean jarraituko du 2022an mundu osoko milaka euskaltzainek espero duten ekitaldia berreskuratzeko. "Hori iritsi bitartean, euskaltegietan lanean jarraituko dugu euskarak merezi duen lekua izan dezan, eta gure herria euskalduntzeko bidean", adierazi zuten. Amaitzeko, eskerrak eman zizkieten urtero euskaltegietara euskara ikasten jarraitzeko asmoz hurbiltzen diren guztiei.
