donostia - Iaz Euskadin 435 salaketa egin ziren medikuen arduragabekeriagatik, Pazientearen Defendatzaileak adierazi duenez. Gure autonomia erkidegoa da, Errioxarekin batera, ebakuntza kirurgiko bat egiteko itxaroteko batez besteko denborarik onena duena, 50 egunen azpitik, elkarteak kaleratutako memorian agertzen diren datuen arabera.
Estatu osoan, 2019an, 13.454 salaketa jaso zituen zabarkeria medikoen ondorioz (2018an baino 881 gutxiago), eta horiek 757 heriotza eragin zituzten (aurreko urtean baino 53 gutxiago), batez ere diagnostikoaren akatsak eraginda.
Zabarkeria mediko eta sanitarioaren kasurik ohikoenak praxi txarraren ondorioz gertatu dira, hala nola gaizki egindako ebakuntzak, presazko altak, arreta eskasa, ospitaleko infekzioak eta anbulantzietako atzerapenak, besteak beste.
Baina arrazoi nagusia diagnostiko-akatsari eta aukera terapeutikoaren galerari zor zaio.
Zehazki, “emaitza ez gustuko ondorioa izandako” kirurgia plastiko, konpontzaile eta estetikoko ebakuntzen ondoren sortutako 343 kasu bildu ditu Defendatzaileak; bestalde, 148 haurtxo desgaitasunen batekin jaio ziren “modu desegokian” edota forzepsekin erditzeak izan ondoren, horrek ondorioak eragin baitzituen, fetu-sufrimendu edo garuneko zein brakial paralisi gisa. Gainera, txostenaren arabera, 35 pertsona hil ziren 112 zenbakira deitu ondoren; kasu batzuetan ez zen anbulantziarik etxera bidali gaixoa ospitale batera eramateko, beste batzuetan erantzuna ordubete baino gehiagoko atzerapenarekin eman zen. Beste 29 gaixo ospitaleko infekzioagatik zendu ziren, zentroek ez zituztelako beharrezko asepsia neurriak bete, memorian agertzen denez.
Autonomia erkidegoka zabarkeriagatik jarritako salaketei dagokienez, Madrilek 3.104 kasu izan ditu eta sailkapenaren buru da aurten ere; ondoren Andaluzia dator (2.593), gero, Katalunia (1.966), Valentziako Erkidegoa (1.152) eta, Gaztela eta Leon (668).
atzetik Horien atzetik datoz Galizia (640 kasu), Gaztela-Mantxa (630), Murtzia (512), Euskal Autonomi Erkidegoa (435), Kanariak (307), Aragoi (305), Extremadura (295), Asturias (238), Balearrak (224), Kantabria (203), Nafarroa (109), Errioxa (66), eta Ceuta eta Melilla (7). - M. Tolosa
