Diario de GipuzkoaDiario de Noticias de Gipuzkoa. Noticias de última hora locales, nacionales, e internacionales.

Saltar al Contenido

Períodico de Diario de Noticias de Gipuzkoa
Ziritik

Oxala

Xabier Euzkitze - 2018(e)ko apirilaren 22a, igandea - 06:03etan eguneratua

Iindarkeriaren erabilerari uko egin ondoren, armak desegitea etorri zen. Orain, azkenean, behin betiko desegiteko urratsa egingo du ETAk. Eragindako kaltearen aitortza testuinguru engainagarrian kokatzen du, eta besteen okerren baitan justifikatzen. Eta, halere, benetan pozgarria da azken pauso hau.

Inor ezin omen da behartu pentsatu edo sentitzen ez duena esatera. Hori ere badio ETAren agiriak, pentsatu edo sentitzen zutena esateagatik hainbat lagun jazarri eta hil ondoren. Aldi berean, beren pentsamoldea isilean gordetzera behartu dituzte beste hainbat herritar, kazetari edo artista. Eta, hala eta guztiz, bozkarioz betetzeko moduko berria da.

ETAk barkamena eskatu die gatazkan parte-hartze zuzenik izan ez zuten biktimei eta haien senideei. Zer ote da parte-hartze zuzena? Guardia Zibil edo militar izatea? Ertzain? Udaltzain? PP edo PSOEko zinegotzi? Yoyes sartzen ote da kontsiderazio horretan? Eta "iraultza-zerga" ordaindu ez izanagatik hil zituztenak? Abiadura Handiko Trenaren obretan parte hartzeagatik garbitutako enpresa-buruak? Tiroz eraitsitako kazetariak?

Biktimen artean eginiko bereizketa bidegabea da ETAren komunikatuaren akatsik larriena, eta euskal gizarteari barkamenik ez eskatzea hutsunerik nabarmenena. Izan ere, geure arteko bizikide-tzari eragin dio kalterik handiena. Berak erdibitu zuen gizartea, berak jasanezin bihurtu egunerokotasuna. Halaber, neurtezina da euskal abertzaletasunari egin dion kaltea, sentipen eta aldarrikapen zilegiak erabat lohitzeraino: "odolorarekin pozoi-tzen dugu / herri baten izerdia" (Xabier Lete).

ETA iragana da, kitto. Bake galanta emango du. "Oxala ez balitz halako ezer inoiz gertatu" idatzi du apirilaren 8an zigilaturiko idatzian. Oxala.


COMENTARIOS:Condiciones de uso

  • No están permitidos los comentarios no acordes a la temática o que atenten contra el derecho al honor e intimidad de terceros, puedan resultar injuriosos, calumniadores, infrinjan cualquier normativa o derecho de terceros.
  • El usuario es el único responsable de sus comentarios.
  • Noticias de Gipuzkoa se reserva el derecho a eliminarlos.
  • Avda. Tolosa 23 20018 Donostia
  • Tel 943 319 200 Fax Administración 943 223 900 Fax Redacción 943 223 902