Diario de GipuzkoaDiario de Noticias de Gipuzkoa. Noticias de última hora locales, nacionales, e internacionales.

Saltar al Contenido

Períodico de Diario de Noticias de Gipuzkoa
Ziritik

Iraganaren kateak

Xabier. Euzkitze - Domingo, 6 de Marzo de 2016 - Actualizado a las 06:13h

arnaldo Otegiri omenaldi jendetsua egin zioten atzo Anoetako belodromoan, askok aurre-kanpainako ekitaldi gisa ulertu dutena. Karismadun politikariak hain urri diren garaiotan, Arnaldorenari beste plus bat erantsi dio sei urte eta erdiko kartzelaldiak. Hainbat aztertzailek elgoibartarraren ibilbide eta bilakaerari nahi bezainbat aitzakia ikusiko badizkio ere, haren azken urteotako jarduna bakeranzko urratsak ematera bideratuta egon da. Beste kontu bat da zerk eraman duen horretara, konbentzimendu etikoak ala komenientzia estrategikoak, baina hura espetxeratu zuenak bazekien indarkeriaren amaierarantz eraman nahi gintuen eragile garrantzitsu bat sartzen zuela itzalean. Aske geratu ondorengo adierazpenetan ere Otegik oso argi utzi du apustu horrek ez duela itzulbiderik.

Etorkizuna lantegi dugun honetan, iraganaren kate astunetatik askatu ezinik gabiltza. Ezker abertzaleaz eta Ahal Dugu alderdiaz bestelako esparruetatik Otegiri etengabe gogorarazten dizkiote garai batean esanak eta esan gabe utziak, honen jarraitzaileek beatifikazio prozesua abiatu dutela salatzen duten aldi berean. Ez da, ordea, iraganaz kargu hartzen dioten bakarra. Espainiako presidentearen inbestidura-saio usteleko eztabaidetan salaketa gogorrak entzun ditugu. Felipe Gonzalezi GAL talde terroristaren burua, “X jauna” izatea leporatu diote. Sozialistei odola irakiten jartzen die GALen garaiak aipatzeak, baina ezin ditugu oroimenetik urrundu Gonzalezek eta beste hainbat alderdikidek Barrionuevo eta Vera terroristei espetxeko atean emandako besarkadak eta egindako omenaldia. Duela 40 urte Fraga Iribarneren aginduz Gasteizen egin zuten sarraskia ere gogora ekarri dute Espainiako Kongresuan. Zigorrik gabe geratu zen, estatuak ez du barkamenik eskatu, PPk ez du sekula arbuiatu. Ez hura eta ez aurreko 40 urteetako diktadura.

“Orainak iragana epaitu nahi badu, etorkizuna galduko du” esan zuen Winston Churchillek, baina etorkizuna irabaztea ere ez da erraza izango bakoitzak dagozkion ardurak bere gain hartu ezean. George Santayana filosofoak idatzi zuenez, “iragana gogoratzen ez dutenak hura errepika-tzera kondenaturik daude”. Guk gogoratu baino gehiago egin behar dugu: argitu.


COMENTARIOS:Condiciones de uso

  • No están permitidos los comentarios no acordes a la temática o que atenten contra el derecho al honor e intimidad de terceros, puedan resultar injuriosos, calumniadores, infrinjan cualquier normativa o derecho de terceros.
  • El usuario es el único responsable de sus comentarios.
  • Noticias de Gipuzkoa se reserva el derecho a eliminarlos.
  • Avda. Tolosa 23 20018 Donostia
  • Tel 943 319 200 Fax Administración 943 223 900 Fax Redacción 943 223 902